الماتىدا بلوكبەكەتتە بولعان جول اپاتىندا زارداپ شەككەن ءۇشىنشى پوليسيا قىزمەتكەرىنىڭ جاعدايى اۋىر، ول جانساقتاۋ بولىمىندە جاتىر. 

قالالىق قوعامدىق دەنساۋلىق ساقتاۋ باسقارماسىنىڭ حابارلاۋىنشا، پاسيەنت №7 قالالىق كلينيكالىق اۋرۋحاناعا جەتكىزىلگەن.

– تەكسەرۋ بارىسىندا كومپيۋتەرلىك توموگرافيا ناتيجەسىندە قوسارلاسقان جاراقات، باسىنىڭ شۇيدە بولىگىنىڭ جاراقاتى، مي سوققى العانى انىقتالدى. باس سۇيەگىنىڭ ارتقى بولىگىنە قان كەتكەن. بەت سۇيەگىنىڭ سول جاعى سىنعان. باسىنىڭ، بەتىنىڭ، بەلىنىڭ جۇمساق تىندەرى سوعىلعان. نەيروحيرۋرگتاردىڭ كونسيليۋمى وتكىزىلدى. ناتيجەسىندە باس سۇيەگى اشىلىپ، ۇيىعان قان الىندى. ءقازىر جاعدايى اۋىر. جانساقتاۋ بولىمىندە جاتىر، – دەدى №7 اۋرۋحانا باس دارىگەرىنىڭ حيرۋرگيا بويىنشا ورىنباسارىنىڭ مىندەتىن اتقارۋشى يلدار قۇرمايەۆ.

ەسكە سالا كەتسەك، بلوكبەكەتتە بولعان قايعىلى وقيعانىڭ سۋرەتتەرى جەلىدە جاريالانعان بولاتىن.